توێژینەوەیەکی نوێ سەلماندوویەتی زیادەڕەویکردن لە بەکارهێنانی خوێ ئەگەری تووشبوون بە شێرپەنجەی گەدە بە رێژەی 41% زیاتر دەکات.
توێژینەوەکە لەلایەن زانایانی زانکۆی ڤییەننا ئەنجامدراوە و دەرکەوتووە، لەپاڵ هۆکارەکانی دیکەی وەک تەمەن و شێوازی ژیان و خواردنەوە زیانبەخشەکان زیادەڕەویکردن لە بەکارهێنانی خوێ بە رێژەی 41% ئەگەری تووشبوون بە شێرپەنجەی گەدە زیاتر دەکات بەراورد بەو کەسانەی بە شێوەی هاوسەنگ یان کەم خوێ بەکاردەهێنن.
بۆ پشتڕاستکردنەوەی ئەنجامەکان زانایان، داتاکانی 471 هەزار و 144 بەریتانیان لە 11 ساڵدا بەکارهێناوە و ئەنجامەکانیان پشتڕاست کردووەتەوە.
شارەزایانی بواری خۆراک دەڵێن، خوێ خانە پارێزەرەکانی گەدە لەناودەبەن و لەوێوە خانە شێرپەنجییەکان دەست بە گەشەکردن دەکەن.
دەکرێت ئەم توێژینەوەیە هۆشیارکردنەوەیەک بێت بۆ ئەو کەسانەی زیادەڕەوی لە بەکارهێنانی خوێدا دەکەن.
