وەزارەتی پەروەردەی هەرێمی کوردستان راگەیەندراوێکی بڵاوکردەوە کە ئاڕاستەی سەرجەم بەڕێوەبەرایەتییەکانی پەروەردەی کردووە و تێیدا ئاماژەی بەوەکردووە، لە تاقیکردنەوەی وزاری و نیشتمانی، پرسیاری تاقیکردنەوەکان دەبرێنە نەخۆشخانە بۆ خوێندکارانی تووشبووی نەخۆشیی شێرپەنجە.
جەخت لەوەشکراوەتەوە، هەر خوێندکارێک لە هەر قۆناغێکی خوێندن بێت، لە تاقیکردنەوەی نیشتمانی و وەزاری، کە تووشبووی شێرپەنجەن و توانای تاقیکردنەوەیان هەیە، لە رێگای لیژنەوە پرسیارەکانیان بۆ دەبرێتە نەخۆشخانە و لەوێ وەڵام دەدەنەوە.
لە بەشێکی دیکەشدا ئەوە خراوەتەڕوو، ئەگەر خوێندکارێک نەخۆشییەکەی لە ئاستێکدا بێت نەتوانێت وەڵامبداتەوە، نمرەی تاقیکردنەوەکانی وەرزی یەکەمی بۆ دادەنرێتەوە (ئەگەر لە بەرژەوەندی بوو)، یان لە خولی دووەم لەسەر نمرەی 100 تاقیکردنەوە دەکات.
