بەڕێوەبەری گشتیی بەنداوەكانی هەرێم رایدەگەیەنێت، ئەمساڵ ئاستی ئاوی بەنداوی دوكان بە بەراورد بە ساڵی رابردوو 4 مەتر زیاترە و دەشڵێت، “هەردوو بەنداوی دەربەندیخان و دهۆك نزیكن لە سەرڕێژبوون”.
رەحمان خانی، بەڕێوەبەری گشتیی بەنداوەكانی هەرێم لە لێدوانێكیدا بە تۆڕی میدیایی ئێستای راگەیاند، رێژەی ئاوی خەزنكراو لە بەنداوی دوكان لە ئەمساڵدا گەیشتووەتە 50% و ئاستی ئاوی بەنداوی دوكان بە بەراورد بە ساڵی رابردوو 4 مەتر زیاترە.
وتیشی، “هەردوو بەنداوی دەربەندیخان و دهۆك نزیكن لە سەرڕێژبوون و دەمانەوێت سوود لەو ئاوە خەزنكراوە وەربگرین و بتوانین ئیدارەی پێبكەین”.
ئاشكراشیكرد، پێشتریش لەگەڵ بەرپرسانی وەزارەتی سەرچاوە ئاوییەكانی عێراق گفتوگۆكراوە و پێمانراگەیاندوون كە بەنداوەكانی هەرێم سوودی بۆ ناوچەكانی عێراق هەیە و بەڵێنیانداوە کە بودجەی پێویست بۆ نۆژەنکردنەوەیان تەرخانبکەن، بەڵام تائێستا بەڵێنەكانیان وەك پێویست کاریان لەسەرنەکراوە”.
