دەزگای ئاسایشی هەرێم دەستگیرکردنی باندێکی ساغکردنەوەی دراوی ساختە رادەگەیەنێت.
دەزگاكە رایگەیاند، هێزەکانی بەڕێوەبەرایەتیی ئاسایشی سلێمانی/ ناوشار بە هەماهەنگی لەگەڵ بەرێوەبەرایەتیی ئاسایشی رۆژئاوای سلێمانی، دوای چاودێری وورد و بەدواداچوون، توانیان باندێکی چوار کەسی ساغکردنەوەی دراوی ساختە دەستگیربکەن.
ئاشكراشیكرد، هێزەكانیان لەچەند هەڵمەتێکدا سەرجەم ئەندامانی باندەکەیان دەستگیركردووە، كە لەمانگی رەمەزاندا دۆلاری ئەمریکی ساختەیان بە دووکاندار و فرۆشیاران داوە، لەپێناو ساغکردنەوەی پارە تەزویرەکەیان و دیناری عێراقیان وەرگرتۆتەوە.
دەزگای ئاسایش ئەوەشی خستەڕوو، دەست بەسەر تەواوی پارەكەشدا گیراوە. تۆمەتباران تەمەنیان لە نێوان (24 بۆ 30) ساڵیدایە و دانیشتووی شاری سلێمانی و قەزای چەمچەماڵن.
لەئێستادا سەرجەم تۆمەتباران بە ماددەی (281) لە یاسای سزادانی عێراقی راگیراون و لێکۆڵینەوە لە دۆسیەکانیان بەردەوامە.
