بەپێی پێشبینییەکانی کەشناسی، لە سەرەتای هەفتەی داهاتووەوە شەپۆلێکی باران بارین ناوچەکانی عێراق و هەرێمی کوردستان دەگرێتەوە.
دەستەی کەشناسیی عێراق لە راگەیەندراوێکدا بڵاویکردەوە، سبەینێ هەینی، ئاسمان ساماڵ دەبێت و پلەکانی گەرمی لە سەرتاسەری وڵات کەمێک بەرزتردەبنەوە.
کەشناسیی عێراق ئاماژە بەوەدەکات، رۆژی شەممە ئاسمان هەور دەبێت لە ناوچەکانی ناوەڕاست و باشوور هەروەها بارانێکی کەم لە ناوچەکانی باکوور دەبارێت و پلەکانی گەرمی بەرزدەبنەوە.
لە بارەی کەشوهەوای رۆژی یەکشەممەوە کەشناسیی عێراق دەڵێت، رۆژی یەکشەممە ئاسمان بەگشتی هەور و نیمچەهەور دەبێت لەگەڵ بارانبارین کە رەنگە هەنێک کات خێرایی با زیادبکات و پلەکانی گەرمی دادەبەزن.
کەشناسیی عێراق دەشڵێت، رۆژی دووشەممە لە ناوچەکانی ناوەڕاست و باشوور ئاسمان هەور دەبێت هەروەها لە ناوچەکانی باکور باران دەبارێت و هەورەتریشقەشی لەگەڵدا دەبێت.
