هاتوچۆی هەولێر داوا لە شۆفێران دەکات، ئۆتۆمبێلەکانیان لەو شوێنانە رانەگرن کە ئەگەری کۆبوونەوەی باراناویان هەیە.
بەڕێوەبەرایەتیی هاتوچۆی هەولێر لە راگەیەندراوێکدا بڵاویکردەوە، ئاگاداری شۆفێرانی شاری هەولێردەکەینەوە، بەهۆی خراپی کەشوهەوا و بارانبارین و ئەگەری کۆبوونەوەی باراناو، بەیانی ئۆتۆمبێلەکانتان لەو شوێنانە رامەگرن کە ئەگەری کۆبوونەوەی باراناویان هەیە.
هاتوچۆی هەولێر لە راگەیەندراوەکەدا دەڵیت، بەتایبەتی نزیک پردی سەیداوە کە پێشووتر چەندین ئۆتۆمبێلی هاوڵاتییان ژێرئاوی باراناو کەوتوون و تووشی زیانی ماڵی بوون، بۆیە داواکارین شۆفێران پابەندی رینماییەکانی ئەم ئاگادارییە بن بۆئەوەی دووربن لەرووداوی نەخوازراو.
ئەوە لەکاتێکدایە، حکومەتی هەرێمی کوردستان رایگەیاند، ئەمشەو ئەگەری روودانی لافاو هەیە و سبەی سێشەممە دۆخی کەشوهەوا سەخت دەبێت.
