وتەبێژی یەکێتیی نیشتمانیی کوردستان رایگەیاند، یەکێتی لەگەڵ ئەوەدایە ئەو بڕە پارەیەی بۆ مووچە هاتووە دابەشبکرێت و دوانەخرێت.
سەعدی ئەحمەد پیرە وتەبێژی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند، ئەمڕۆ بەسەرپەرشتی سەرۆک بافڵ جەلال تاڵەبانی مەکتەبی سیاسیی یەکێتیی درێژەی بە کۆبوونەوەکانی دا، بەشێکی کۆبوونەوەکە تایبەت بوو بە دیاریکردنی کاندیدەکانی یەکێتی بۆ هەڵبژاردنی پەرلەمانی کوردستان، کۆبوونەوەکە هێشتا تەواونەبووە و بەردەوام دەبێت، سبەینێ و دووسبەی، ئەو لیستانەی کە ماون جێگیر دەکرێن و رادەستی کۆمسیۆن دەکرێن.
ئاماژەی بەوەشکرد، لە رۆژانی رابردوو مقۆ مقۆیەک لەبارەی مووچەوە دەستیپێکردووە، ئەمەوێت بە راشکاوی پێتان بڵێم، یەکێتی لە 2014 ەوە شەو و رۆژی سەریەک ناوە بۆ چارەسەری کێشەی مووچە، چۆن ئێستا دەکرێت لەگەڵ ئەوە بێت مووچە دابەشنەکرێت، ئێمە پێمانماوە، پارەی مووچەی ئەو شوێنانەی کە لە بەغدادەوە هاتووە دابەشبکرێت.
