لیژنەی دارایی ئەنجومەنی نوێنەرانی عێراق خواستی خۆی بۆ هەماهەنگی لەگەڵ بانکی ناوەندی بۆ زیادکردنی بەهای دینار و کۆنتڕۆڵکردنی بازاڕ راگەیاند.
ئەمڕۆ پێنجشەممە، بەشی راگەیاندنی ئەنجومەنی نوێنەرانی عێراق لە راگەیەندراوێکدا بڵاویکردەوە، “لیژنەی دارایی بە سەرۆکایەتیی عەتوان عەتوانی، لەگەڵ عەلی عەلاق پارێزگاری بانکی ناوەندیی عێراق بۆ تاوتوێکردنی سیاسەتی دراو و سیستمی بانکی لە وڵاتدا و رێگاکانی بەرزکردنەوەی بەهای دیناری عێراقی کۆبووەوە”.
بەپێی راگەیەندراوەکەی ئەنجومەنی نوێنەران، سەرۆکی لیژنەی دارایی جەختی لە گرنگیی بەدواداچوون بۆ مەلەفی ئابووری و سیاسەتی دراو، لەسەر بنەمای لایەنی چاودێری و دۆزینەوەی چارەسەری گونجاو بۆ ئاستەنگەکانی بەردەم کاری بانکی ناوەندیی عێراق، کردەوە.
لە راگەیەندراوەکەی ئەنجومەنی نوێنەراندا هاتووە، لیژنەی دارایی ئامادەیی خۆی بۆ هەماهەنگی لەگەڵ بانکی ناوەندی بەمەبەستی بەرزکردنەوەی بەهای دیناری عێراقی و کۆنترۆڵکردنی بازاڕ بەمەبەستی کەمکردنەوەی بارگرانی لەسەر هاوڵاتییان و چارەسەرکردنی کورتهێنان، راگەیاند.
