ئەمڕۆ پێنجشەممە وەفدێکی باڵای مەکتەبی سیاسیی یەکێتیی نیشتمانیی کوردستان لە دەباشان پێشوازیان لە محەمەد حەلبووسی سەرۆكی حزبی تەقەدوم و وەفدێکی یاوەریکرد و لە کۆبوونەوەیەکیاندا دۆخی گشتیی هەرێم و عێراق گفتوگۆیان لەبارەوە کرا.
هەر لە کۆبوونەوەکەدا هەماهەنگی و هاریکاری و لێکتێگەیشتنی هاوبەش لەنێوان هەرێم و بەغدا دووپاتکرایەوە بە ئاڕاستەی چارەسەرکردنی دەستووریانە و یاساییانەی کێشەکانی نێوان هەردوولا و پاراستنی بەرژەوەندییە هاوبەشەکان کە ببێتە مایەی سەقامگیری زیاتر لە وڵاتدا.
هاوکات لە بەشێکی دیکەی کۆبوونەوەکەدا بەوردی پرسی ئیدارەدانی كەركوك و تەواوكردنی رێكارە یاساییەكان و پێکهێنانی حکومەتی خۆجێیی کەرکوک تاوتوێکرا و جەخت لە چارەسەرکردنی کێشەکانی بەردەم ئەم پرۆسەیە کرایەوە بەشێوەیەك هەموو هەوڵەكان لەچوارچێوەی خزمەتكردنی كەركووك و هەموو نەتەوە و پێکهاتەکان بێت بەبێ جیاوازی.
لەبەشێکی دیکەدا پتەوکردنی پەیوەندییەکان و هاریکاری هاوبەش لە نێوان هەردوولا گفتوگۆیان لەبارەوەکراو پێویستی کاری پێکەوەیی و هەماهەنگی بەردەوام لەنێوان یەکێتی و حزبی تەقەدوم دووپاتکرانەوە.
لای خۆشییەوە ئەندامانی مەکتەبی سیاسی یەکێتیی نیشتمانیی کوردستان تەئکیدیانکردەوە لە هاوبەشێتی راستەقینە و کاری پێکەوەیی نێوان سەرجەم لایەنە براوەکانی کەرکوک و پاراستنی کەلتووری برایەتی و پێکەوەژیان بە شێوەیەک لە ئیدارەی نوێ کەرکوک هیچ لایەنێک فەرامۆش نەکرێت و ئەولەویەتی کارکردنی داهاتووش خزمەتکردنی کەرکوکییەکان بێت، داواشکرا لایەنەکان هاوکاربن لە نەهێشتنی بەربەستەکان و زوو پێکهێنانی ئیدارەی کەرکوک.
