پۆلیسی کەرکوک دەستگیرکردنی 18 دەرۆزەکەری راگەیاند کە لەناو شەقام و کۆڵانەکانی شارەکەدا دەرۆزەیان دەکرد.
بەڕێوەبەرایەتیی پۆلیسی کەرکوک بڵاویکردەوە، بەمەبەستی کەمکردنەوەی دیاردەی دەرۆزەکردن کە بەشێوەیەکی بەرچاو لەنێو نەوجەوانان و ئافرەتاندا بڵاوبووەتەوە، بەسەرپەرشتی و فەرمانی فەرماندەیی پۆلیسی کەرکوک هەڵمەتێک بۆ دەستگیرکردنی دەرۆزەکەرەکانی ناو سەنتەری شار و قەزاکانی سەر بەکەرکوک دەستپێکرد و لەو چوارچێوەیەشدا توانرا 18 کەس دەستگیربکرێن.
ئاشکراشیکرد، ئامانجی هەڵمەتەکە رێگریکردنە لەو کەسانەی کە خۆیان دەرۆزە دەکەن و ژنانی ئاوارەو منداڵان و هەرزەکارانیش بۆ داهاتی نایاسایی و سواڵکردن بەکاردەهێنن.
باسیلەوەشکرد، هەڵمەتەکە بەردەوام دەبێت تا ئەو کاتەی ئەو دیاردەیە بەتەواوی بنبڕ دەکرێت.
