ئەنجومەنی سەرتاسەریی مامۆستایانی ناڕازی بە رەسمی “هەڵپەساردنی بایكۆت” رادەگەیەنێت.
ئەنجومەنەكە راگەیەندراوێكی بڵاوكردەوە و تیایدا هاتووە، پاش کۆبوونەوەی بەشێک لە نوێنەرانی مامۆستایانی ناڕازی لەگەڵ قوباد تاڵەبانی، جێگری سەرۆکی حکومەت، لە کۆبوونەوەکەدا بڕیاریدا پاش هەموارکردنەوەی یاسای بودجەی عێراق:
1- پلەبەرزکردنەوەی مامۆستایان بەپێی ساڵانی خزمەت، بخرێتە بواری جێبەجێکردنەوە.
2- بە گرێبەستکردنی وانەبێژان بە قۆناغبەندی.
مامۆستایانی ناڕازی باس لەوەشدەكات، قوباد تاڵەبانی بەڵێنیشیاندا بۆ جێبەجێکردنی داواکارییەکانی دیکەی مامۆستایان؛ بەردەوام لەسەر خەت دەبن و هەموو هەوڵێکی خۆیان دەخەنەگەڕ.
دەشڵێت، وەک ئەنجومەنی سەرتاسەریی مامۆستایانی ناڕازی، لەژێر رۆشنایی ئەو بڕیار و بەڵێنانەی جێگری سەرۆکی حکومەت؛ وەک دەرفەتێکی تر بە دەسەڵات و نەفەوتانی ساڵێکی خوێندن، بڕیارماندا بە هەڵپەساردنی بایکۆت، لە ئەگەر جێبەجێنەکردنی بڕیارەکانیش، بەگوڕوتینی نوێوە دێنەوە مەیدان.
هەروەك سوپاسی مامۆستایان و تەواوی چین و توێژەکان دەكات كە “جوامێرانە و ماندوونەناسانە بەتەنگ سەرخستنی ئەم خەباتە مەدەنییەوە بوون”.
