پاسپۆرتی سلێمانی لە بارەی نۆرەگرتنی ئەلیکترۆنییەوە رایگەیاند، “پێویستە هاوڵاتییان ئەو باڕکۆدەی لەدوای بەدەستهێنانی نۆرەکەیان بەدەستیان دەگات لەلای خۆیان بیپارێزن”.
بەڕێوەبەرایەتیی پاسپۆرتی سلێمانی هاوڵاتییان ئاگاداردەکاتەوە و ئاماژە بەوە دەکات، “لە کاتێکدا لە بەدەستھێنانی نۆرەگرتنی ئەلیکترۆنی (حجزی ئەلیکترۆنی) سەرکەوتوودەبیت، باڕکۆدێکت بەدەستدەگات، پێویستە ئەو باڕکۆدە بکەیتەوە تاوەکو دڵنیابیتەوە لە رۆژ و کاتی سەردانیکردنت بۆ بەڕێوەبەرایەتییەکەمان”.
ئەوەشی خستووەتەڕوو، “سایتی نۆرەگرتنی ئەلیکترۆنی ھەموو شەوانی پێنجشەممە لەسەر ھەینییەک، لە کاتژمێر 9:00ی شەو کارا دەبێت تاوەکو ئەو کاتەی شوێنی نۆرەگرتن نامێنێت”.
ئەو بەڕێوەبەرایەتییە جەختلەوەش دەکاتەوە، “پێویستە ناوی سیانی ئەو هاوڵاتییەی داواکاری پێشکەشدەکات هاوشێوەی ئەو ناوە بێت کە لەسەر کارتە نیشتمانییەکەی نووسراوە”.
