بەڕێوەبەری کوشتارگەی سلێمانی، رایدەگەیەنێت،”پێویستە سەرچاوەی هاوردەکردنی گۆشتی سووری بەستوو دیار و سەلامەت بێت”.
د.شاڵاو عارف، بەڕێوەبەری کوشتارگەی سلێمانی، بە تۆڕی میدیایی ئێستای راگەیاند، پاڵەوانی سیستمی سەلامەتیی گشتیی کۆمەڵگە هاوڵاتییە و دەبێت لە بەکارهێنانی گۆشتی سووری بەستوو هۆشیاربن.
ئاماژەی بەوەش کرد، پێویستە هاوڵاتییان ئەو گۆشتانە بەکاربهێنن کە مۆری تەندروستییان لێدراوە، و هاوکات سەیری ئەو شوێنە بکەن کە گۆشتەکەی لێدەکڕن بزانن هەتا چەند مەرجەکانی سەلامەتی تێدایە لە پاکوخاوێنی و هەبوونی پلەی گەرمیی گونجاودا.
لەبارەی شێوازی هاوردەکردنی گۆشتی سووری بەستووەوە د. شاڵاو عارف، وتی، دەبێت سەرچاوەی هاوردەکردنی گۆشتی بەستوو دیار و سەلامەت بێت، بۆ ئەو مەبەستە پێویستە تیمێکی پسپۆڕ چاودێریی بەرهەمهێنان و هاوردەکردنی گۆشت بکەن، بەڵام لە هەرێمی کوردستان ئەوە ناکرێت.
