بەڕێوەبەرایەتیی گشتیی پەروەردەی گەرمیان رایدەگەیەنێت، پڕۆسەی خوێندن لە كفری دەستیپێكردەوە و ژمارەیەك بەڕێوەبەری دڵسۆز و خەمخۆری شاری كفری ئەمڕۆ دەستیان بە دەوامی ئاسایی خۆیان كردووەتەوە.
بەپێی راگەیەندراوێكی بەڕێوەبەرایەتیی گشتیی پەروەردەی گەرمیان كە وێنەیەكی دەست تۆڕی میدیایی ئێستا كەوتووە و تێیدا هاتووە، دوێنی ژمارەیەك لە بەڕێوەبەری دڵسۆز و خەمخۆری شاری كفری رایانگەیاند، دەوامی ئاسایی خۆیان دەستپێدەكەنەوە و ئەمڕۆ چوارشەممە ناوەندەكانی خوێندنیان بەرووی خوێندكاراندا كردووەتەوە.
هەر لە راگەیەندراوەكەدا هاتووە، هەر ئەمڕۆش بەڕێوەبەری گشتیی پەروەردەی گەرمیان بە یاوەریی بەڕێوەبەری سەرپەرشتیكردنی پەروەردەیی گەرمیان و سەرپەرشتیاری یەكەمی پەروەردەی كفری بە مەبەستی پشتیوانی و بەرزنرخاندنی هەڵوێستی جوامێرانەیان ژمارەیەك خوێندنگەی ناو شاری كفرییان بەسەركردەوە كە تیایدا پڕۆسەی خوێندن دەستیپێكردووەتەوە.
