لە سەردانەکەیدا بۆ عێراق، وەزیری بەرگریی تورکیا لەگەڵ سەرۆک کۆماری عێراق کۆبووەوە و چەند پرسێکیان تاوتوێ کرد.
د.لەتیف رەشید، سەرۆک کۆماری عێراق، لە کۆشکی بەغداد پێشوازی لە یەشار گولەر، وەزیری بەرگریی تورکیا و وەفدی یاوەری کرد و کۆبوونەوەیەکیان ئەنجامدا.
یەکێک لە تەوەرەکانی کۆبوونەوەکە پرسی دەستپێکردنەوەی گەشتە ئاسمانییەکانی نێوان سلێمانی و شارەکانی تورکیا بوو، سەرۆک کۆماری عێراق، رایگەیاند، راگرتنی گەشتە ئاسمانییەکانی فڕۆکەخانەی سلێمانی دەبێتەھۆی تێکدانی ھاریکاری ھاوبەش و رێگری لە پاراستنی پەیوەندییە کۆمەڵایەتییەکانی نێوان ھەردوو گەل دەکات.
یەشار گولەر، وەزیری بەرگریی تورکیا ویستی خۆی نیشاندا بۆ دۆزینەوەی رێگەچارەیەک بۆ دەستپێکردنەوەی گەشتە ئاسمانییەکانی نێوان سلێمانی و شارەکانی تورکیا.
هەر لە کۆبوونەوەکەدا، سەرۆک کۆمار جەختیکردەوە لە پێویستی رێزگرتن لە سەروەریی عێراق و راگرتنی ئەو پێشێلکارییە سەربازییانەی دەکرێنە سەر خاکی عێراق لەنێویاندا شارەکانی ھەرێمی کوردستان.
