وەزیری دارایی هەرێم رایدەگەیەنێت، بە وشەی ئینفاقی فیعلی دەستخراوەتە قوڕگی مووچەخۆرانی هەرێم و دەشڵێت، ” لە عێراق كۆدەنگی هەیە مووچەی مووچەخۆران لە پرسەكانی دیكە جیابكرێنەوە و كێشەی مووچە چارەسەربكرێت”.
ئاوات شێخ جەناب وەزیری دارایی هەرێم لە لێدوانێكیدا راگەیاند، لە ساڵی 2019ەوە لیستی مووچەخۆرانی هەرێم بە بەغداد دراوە و لە 90 %ی لیستی مووچەخۆرانی هەرێم پاك و بێگەردە و هەردوو دیوانی چاودێریی دارایی عێراق و هەرێم پێشتر وردبینیان تێدا كردووە.
وتیشی، “یاسای بودجە كێشەی بۆ هەرێم و عێراقیش دروستكردووە و چاوەڕواندەكرێت دوای هەڵبژاردنی سەرۆكی ئەنجومەنی نوێنەرانی عێراق هەنگاوەكان بۆ هەمواری یاسای بودجە لە پەرلەمان دەستپێبكات و جگەلەوەش لە عێراق كۆدەنگی هەیە مووچەی مووچەخۆران لە پرسەكانی دیكە جیابكرێنەوە و كێشەی مووچە چارەسەربكرێت و بەهۆی هەندێك گرفتی دەستكرد ناردنی 618 ملیار دینارەكە دواخرابوو”.
لەبارەی پلەبەرزكردنەوەوە ئاماژەی بۆ ئەوەش كرد، “پێشنیازیان بۆ بابەتی پلەبەزركردنەوەی فەرمانبەرانی هەرێم ئاراستەی حكومەتی عێراق كردووە”.
