ئەندامێكی لیژنەی یاسایی لە پەرلەمانی عێراق ئاشكرایدەكات، “لەمساڵدا پەرلەمان پێنج پرۆژەیاسای گرنگ پەسەند دەكات، لەوانە یاسای دادگای فیدراڵی.”
لە لێدوانێكدا بۆ “تۆڕی میدیایی ئێستا”، حەسەن فەدعەم جەنابی، ئەندامی لیژنەی یاسایی لە پەرلەمانی عێراق وتی، “پەرلەمان هەوڵدەدات لەو یاسایانەی لەمساڵدا دەریاندەكات، پێنج یاسای گرنگ هەبن.”
ئاشكراشیكرد كە ئەو یاسایانە بریتین لە یاسای دادگای فیدراڵی، یاسای تاوانی ئەلیكترۆنی، یاسای ئەنجومەنی وەزیران و پێكهاتەكانی، یاسای هەڵبژاردنی ئەنجومەنی پارێزگاكان و یاسای سەرپەرشتیاریی دادوەری.”
پرۆژەیاسای دادگای فیدراڵی نزیكەی دوو ساڵە پەسەندكردنی دوادەخرێت، بەهۆی پەسەندنەكردنییەوە چەندین كێشەی دەستووری و یاسایی لە عێراقدا دروستبوون، بەوپێیەی یەكلاییكردنەوەی بەشێك لە كێشە و كەیسە یاساییەكان لەنێوان دەسەڵاتەكانی دەوڵەتدا، ئەركی دادگای فیدراڵییە و لەلایەن ئەو دادگایەوە بڕیاریان لەبارەوە دەدرێت.
