بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە جەیمس گۆڵدمان، کونسوڵی گشتیی بەریتانیا لە هەرێمی کوردستان کرد.
لە دیدارێکدا کە د. یوسف گۆران و د. جوان ئیحسان، ئەندامانی مەکتەبی سیاسیی یەکێتی و دارا خەیلانی، لێپرسراوی بۆردی پەیوەندییەکان ئامادەبوون، بەردەوامیی گفتوگۆکانی نێوان هەرێمی کوردستان و عیراق بۆ چارەسەرکردنی کێشە سیاسی و داراییەکان جەختیلێکرایەوە بەتایبەت پرسی مووچەخۆرانی هەرێم.
سەرۆک بافڵ جەلال تاڵەبانی لە دیدارەکەدا ئاماژەی بە هەوڵەکانی یەکێتی کرد بۆ چارەسەرکردنی ناکۆکییەکان و وتی، پێویستە هەمووان پابەند بە دەستوور کاربکەن و بکرێتە بنەمای چارەسەرکردنی کێشەکان، لەو چوارچێوەیەشدا ئەنجامی باش بەدەستهاتوون تاوەکو چیتر مووچەخۆرانی هەرێم نەبنە قوربانیی ململانێ سیاسییەکان.
