بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازیی لە مارك سترۆ، كونسوڵی گشتیی ئەمریكا لە هەرێم كرد.
لە دیدارێكدا كە د. یوسف گۆران و د. جوان ئیحسان، ئەندامانی مەكتەبی سیاسی و دارا خەیلانی، لێپرسراوی بۆردی پەیوەندییەكان ئامادەبوون، دوایین گۆڕانكارییە سیاسییەكان گفتوگۆیان لەبارەوەكرا و جەخت لە گفتوگۆ و لێكتێگەیشتنی نێوان لایەنە سیاسییەكان كرایەوە بە ئامانجی چارەسەركردنی كێشەكان و گەیشتن بە چارەسەرێكی گونجاو لەپێناو پاراستنی سەقامگیری لە ناوچەكە.
لە درێژەی دیدارەكەدا دۆخی سیاسیی عێراق تاوتوێكرا، سەرۆك بافڵ جەلال تاڵەبانی هەڵوێستی یەكێتی روونكردەوە و رایگەیاند، “هەوڵەكانمان بە ئاڕاستەی سەرخستنی پرۆسەی سیاسی و پاراستنی ئارامیی وڵاتە لە كێشە هەرێمییەكان”.
وتیشی، “كێشەكانی هەڵبژاردنی سەرۆكی ئەنجومەنی نوێنەران بەرەو چارەسەر دەڕوات و تێگەیشتنی تەواو دروستبووە كە دەبێت دەسەڵاتی یاسادانان كاراتربكرێت”.
لەبارەی هەڵبژاردنی پەرلەمانی كوردستانیش سەرۆك بافڵ جەختی لە ئەنجامدانی هەڵبژاردنێكی بێگەرد كردەوە كە رەنگدانەوەی خواستی هەموو لایەنە سیاسییەكان بێت و ببێتە هۆی بەهێزتركردنی قەوارەی هەرێم نەك لێكترازان.
