پێشبینی دەكرێت لە هەفتەی داهاتووەوە هەنگاوەكان بۆ پێكهێنانی ئەنجومەنی پارێزگاكان دەستپێبكات.
دوای ئەوەی دوێنێ کۆمسیۆنی باڵای سەربەخۆی هەڵبژاردنەکانی عێراق ئەنجامی هەڵبژاردنی پارێزگاکانی پەسەندکرد، هەنگاوەكان بۆ پێكهێنانی ئەنجومەنەكان دەستپێدەكات.
محەمەد بەلداوی، ئەندامی ئەنجومەنی نوێنەرانی عێراق پێشبینی خۆی نیشاندا بەوەی یەكەم كۆبوونەوەی ئەنجومەنی نوێی پارێزگاكان هەفتەی داهاتوو ئەنجامبدرێت.
وتیشی، “پرۆسەكە بەپێی چوارچێوە یاساییەكان دەبێت لەڕێی راستاندنی ئەندامێتیی ئەندامانی براوەی ئەنجومەنی پارێزگاكان لەلایەن دادگای پێداچوونەوە و سوێندخواردنی یاسایی” ئەوەشی وت، “تەواوكردنی پێكهاتەی ئەنجومەنەكان پاش كۆبوونەوەی یەكەم دەبێت”.
ماوەی یاسایی بۆ ئەنجامدانی كۆبوونەوەی یەكەمی ئەنجومەنی پارێزگاكان لە 15 رۆژی پاش راستاندنی رەسمی دەبێت، وەك ئەوەی پەرلەمانتارەكە روونیكردەوە.
باسی لەوەشكرد، هەنگاوی یەكەم كە لە كۆبوونەوەی یەكەمدا ئەنجامدەدرێت، دەنگدانە لەسەر هەڵبژاردنی سەرۆكی ئەنجومەنی پارێزگا.
رۆژی 18ی کانونی یەکەمی 2023 هەڵبژاردنی ئەنجومەنی پارێزگاكان لە كەركوك و پارێزگاكانی ناوەڕاست و باشووری عێراق دەستیپێكرد و شەوی 28ی هەمان مانگ کۆمسیۆن ئەنجامی كۆتایی هەڵبژاردنەكەی ئاشكراكرد، دوێنێش دوای یەكلاكردنەوەی تانەكان ئەنجامەكان پەسەندكران.
