وتەبێژی پۆلیسی سلێمانی ئەو تۆمەتبارانەی رووبەڕووی مەفرەزەکانی پۆلیس بوونەتەوە، چەندین فەرمانی دەستگیرکردنیان هەبووە و بەرەبەیانی ئەمڕۆ دەستگیرکراون.
سەرکەوت ئەحمەد لێپرسراوی راگەیاندنی پۆلیسی سلێمانی لە کۆنگرەیەکی رۆژنامەوانیدا رایگەیاند، شەوی رابردوو لە شەقامی پیرەمێرد مەفرەزەیەکی بەشی نەهێشتنی تاوان چاودێری تۆمەتبارێکیان کردووە کە فەرمانی دەستگیرکردنی هەبووە و پێشتریش سزادراو بووە، مەفرەزەکان توانیویانە تۆمەتبارەکە دەستگیربکەن، لەو کاتەدا هاوڕێیەکی تۆمەتبارەکە بە ماتۆڕسکیلێکەوە هاتووە و تەقەی لە مەفرەزەکە کردووە.
ئاماژەی بەوەشکرد، لە ئەنجامی تەقەکردنەکەدا، رێگەپێدراوێکی ئێمە و ئەفسەرێکی پۆلیس و هاوڵاتییەک کە لەو کاتەدا لە شوێنی رووداوەکە بووە برینداربوون، دوای گەیاندنیان بە نەخۆشخانە ئەفسەرەکە گیانیلەدەستداوە.
ئاشکراشیکرد، تۆمەتبارەکان لە زۆرینەی بنکەکانی ناوشار و دەرەوەی شار و لای ئاسایشیش فەرمانی دەستگیرکردنیان هەبووە، بەرەبەیانی ئەمڕۆ توانرا هەردووکیان دەستگیربکەن.
