بزوتنەوەی گۆڕان بڕیاریدا سەرەتای هەفتەی داهاتوو دووەم كۆنفرانسی نیشتمانی لە سلێمانی ئەنجامبدات.
ژووری هەڵبژاردنی بزوتنەوەی گۆڕان لە راگەیەندراوێكدا بڵاویكردەوە، بەپێی بڕیار و راسپاردەی کۆبوونەوەی جڤاتی نیشتمانی و جڤاتی گشتیی بزوتنەوەی گۆڕان لە رۆژی 6ی ئەم مانگە، بزوتنەوەی گۆڕان لە رۆژانی شەممە و یەکشەممە (20 و 21ی كانونی دووەم) گرێدەدات.
كۆنفرانسەكە لەژێر دروشمی (گۆڕان بەرەو قۆناغێکی نوێ بۆ رووبەڕووبوونەوەی ئاڵنگارییەکان) بڕیارە لە گردی زەرگەتەی شاری سلێمانی بەڕێوەبچێت.
بەپێی پەیڕەوی ناوخۆی حزبەكە ئەركەكانی كۆنفرانسی نیشتمانی دیاریكراوە و بریتییە لە، (دانانی بەرنامەی سیاسی، پێداچوونەوە بە دەستووری ناوخۆیی گۆڕان، گۆڕینی دروشمی بزوتنەوەكە، پەسەندكردن و دەستكاری پلاتفۆرمەكانی هەڵبژاردن، هەڵسەنگاندنی ئەدائی نوێنەران لە دەزگا هەڵبژێردراوەكان و هەڵسەنگاندنی ئەدائی جڤاتی نیشتمانی).
لە كۆنفرانسەكەدا بەپێی پەیڕەو هیچ هەڵبژاردنێك بۆ نوێكردنەوەی جڤاتی گشتی و نیشتمانی و خانەی راپەڕاندن و رێكخەری گشتیی بزوتنەوەكە ئەنجامنادرێت و نوێكردنەوەی ئەو ئۆرگانە باڵایانەی بزوتنەوەكە لە پرۆسەیەكی دیكە جیا لە كۆنفرانس دەبێت.
