بەیانی ئەمڕۆ بۆ سێیەم رۆژ لەسەریەک تیمەکانی بەرگریی شارستانیی هەولێر لە گەڕان بەدوای تەرمی دایەنی کچەکەی پێشڕەو دزەیی کە لە شەوی دووشەممە ماڵەکەیان بۆردومانکرا بەردەوامە.
بەڕێوەبەرایەتیی بەرگریی شارستانیی هەولێر بڵاویکردەوە، ئەمڕۆ پێنجشەممە گەڕان بەدوای تەرمی مێشل میندۆزا، دایەنی کچەکەی پێشڕەو دزەیی بەردەوامە.
مێشل میندۆزا بە رەگەز فلیپینییە و تەمەنی 41 ساڵە، وەک دایەنی ژینەی تەمەن 11 مانگ لە ماڵی پێشڕەو دزەیی کاریکردووە، لە کاتی بۆردومانەکەی ئێران بۆ سەر ماڵەکەیان لە ژوورەکەی خۆیدا بووە، لە ئێستادا تەنها کەسە کە لە رووداوەکەدا بێسەروشوێن بووبێت.
دوێنێ چوارشەممە تیمەکانی بەرگریی شارستانیی هەولێر توانیان پاسپۆرتی ناوبراو بدۆزنەوە.
