دڵشاد شەهاب وتەبێژی سەرۆکایەتیی هەرێمی کوردستان رایگەیاند، کۆبوونەوەی ئەمڕۆی سەرۆکایەتیی هەرێم و کۆمسیۆنی هەڵبژاردنەکان و لایەنە پەیوەندیدارەکان لە هەرێم بەڕێوەچوو و لە ئایندەدا وادەی هەڵبژاردنی پەرلەمانی کوردستان دیاری دەکەین.
دڵشاد شەهاب لە کۆنفرانسێکی رۆژنامەوانیدا رایگەیاند، کۆمسیۆن دەمێکە دەستی بە ئامادەکارییەکان بۆ ئەنجامدانی هەڵبژاردنی پەرلەمانی کورستان کردووە، کۆبوونەوەی ئەمڕۆش بۆ ئەوەبوو نەخشەرێگایەک بۆ ئەنجامدانی دابنێین بتوانین لە ئایندەدا بەروارێک بۆ ئەو مەبەستە دیاری بکەین.
ئاماژەی بەوەشکرد، لە ئەنجامدانی هەڵبژاردنەکان ئێمە چەند کێشەیەکمان هەیە، یەکەمیان ئەوەیە مانگی تەمموز وادەی یاسایی کۆمسیۆن تەواو دەبێت، کۆتایی ساڵی خوێندنە دەبێت هەماهەنگی لەگەڵ بەرپرسانی پەروەردە بکەین دواتر بە هەماهەنگی دوای گفتوگۆ لەگەڵ لایەنە سیاسییەکان سەرۆکایەتی هەرێم بەرواردێک بۆ ئەنجامدانی هەڵبژاردنەکان دادەنێت.
لای خۆیەوە حاکم عومەر سەرۆکی ئەنجومەنی کۆمسیاران وتی، کۆبوونەوەکەمان بەرهەمداربوو، لەکاتێکی گونجاودا ئامادەیی تەواومان هەیە هەڵبژاردنی پەرلەمانی کوردستان بە جوانترین شێوە ئەنجامبدەین.
