وەزارەتی تەندروستیی هەرێم چەند بڕیارێكی نوێی تایبەت بە هاتوچۆی گەشتیاران لەڕێی فڕۆكەخانەكانەوە دەركرد، بەوەش گۆڕانكاری لە بەشێك لە ڕێنماییەكانی پێشووی خۆی لەبارەی كۆرۆناوە كردووە.
لە نوسراوێكدا كە ئاڕاستەی وەزارەتی گواستنەوە و گەیاندنی هەرێم كراوە، وەزارەتی تەندروستیی هەرێم چەند گۆڕانكارییەكی لە ڕێنمایی دەستپێكردنەوەی گەشتە ئاسمانییەكان ئەنجامداوە.
لەو نوسراوەدا كە بەرواری 26ی تشرینی دووەمی لەسەرە و ئەمڕۆ دووشەممە 30ی تشرینی دووەم بڵاوكراوەتەوە، وەزارەتی تەندروستی ڕایگەیاندووە، “ئەو گەشتیارانەی كە لە ناوەڕاست و خوارووی عێراق لەڕێی هەردوو فڕۆكەخانەی سلێمانی و هەولێرەوە دەگەڕێنەوە بۆ هەرێم، پێویست ناكات پشكنینی كۆرۆنا ئەنجامبدەن”.
لە خاڵی دووەمی نوسراوەكەدا هاتووە، “هەڵگرتنی كەرەنتین لەسەر ئەو گەشتیارانەی كە هیچ نیشانەیەكیان نییە و بەركەوتەی كۆرۆنا نین بەپێی كۆتا پرۆتۆكۆلی ڕێكخراوی تەندروستی جیهانی، بەڵام پێویستە چاودێریی خۆیان بكەن لە ڕۆژی گەڕانەوەیان بۆ ماوەی 14 ڕۆژ و لەكاتی بوونی هەر نیشانەیەك دەزگا تەندروستییەكان ئاگادار بكەنەوە، بەگوێرەی ڕێنماییەكان و پڕۆتۆكۆڵە تەندروستییە كارپێكراوەكانی هەرێم، بۆیە پێویست بە وەرگرتنی بەڵێننامە ناكات”.
وێنەی نوسراوەكەی تەندروستیی هەرێم..
