سەرجەم ئەو پاسەوان و كارمەندانە رزگاركران كە لەلایەن بەندكراوانەوە لە حەوت بەندینخانەی ئیكوادۆر دەستبەسەركرابوون.
بەندكراوان لە دووشەممەی رابردووەوە 158 پاسەوان و 20 كارمەندی كارگێڕییان بەبارمتەگرتبوو، لە چوارچێوەی ئەو كارە توندوتیژییانەی وڵاتەكەی گرتبووەوە كە دەكەوێت ئەمریكای باشوورەوە.
دانیال نۆبوا، سەرۆكی ئیكوادۆر دەستخۆشی لە پۆلیس و هێزە چەكدارەكان كرد بەهۆی سەركەوتنیان لە ئازادكردنی پاسەوان و كارمەندان.
لای خۆیەوە ئاژانسی نیشتمانیی بەندیخانەكان بڵاویكردەوە، لێكۆڵینەوە دەكرێت بۆ دیاریكردنی بەرپرسانی بەبارمتەگرتنەكە. لەكاتێكدا بەهۆی توندوتیژییەكانەوە لانیكەم پاسەوانێك كوژرا و ژمارەیەكی دیكە برینداربوون.
لە بەندینخانەی ماچالا-ش پێكدادانی چەكداری لەنێوان هێزە ئەمنییەكان و بەندكراواندا روویدا، دوای ئەوەی سوپا و پۆلیس هەڵمەتێكیان لەناو بەندینخانەكان لە شەش شاری وڵاتەكەدا ئەنجامدا، وەك ئەوەی ئاژانسی فرانس پرێس بڵاویكردووەتەوە.
لە یەكشەممەی رابردووەوە ئیكوادۆر بە قەیرانێكی ئەمنیی بێپێشینەدا تێدەپەڕێت پاش هەڵاتنی ئەدۆلفۆ ماسیاس-ی سەرگروپی چۆنیرۆس لە بەندینخانەی گوایاكیل كە لەژێر پاسەوانی و چاودێرییەكی تونددایە.
هەڵاتنەكەی بووە هۆی سەرهەڵدانی یاخیبوون و دەستبەسەركردنی پاسەوانان وەك بارمتە لە بەندینخانە جیاجیاكانی وڵاتەكەدا، سەرەڕای هێرشكردنەسەر پۆلیس و سووتاندنی ئۆتۆمبێل.
