لە نوێترین هەڵوێستدا ئەنجومەنی مامۆستایانی ناڕازی سەرەڕای جەختكردەوە لە بایكۆت دەڵێت، رێگای کردنەوەی دەرگای خوێندنگەکان فشار و هەڕەشە نییە، جێبەجێكردنی داواكارییەكانە.
ئەنجومەنی سەرتاسەریی مامۆستایانی ناڕازی راگەیەندراوێكی بڵاوكردەوە و تیایدا هاتووە، دوای ئەوەی دەسەڵات هەموو هەوڵە حیزبی و ئیدارییەکانی لەمڕۆدا بۆ کردنەوەی دەرگای خوێندگەکان چڕکردبۆوە، بەڵام خۆشبەختانە بە ئیرادەی بەهێزی مامۆستایان و پێداگرییان لەسەر بەدەستهێنانی مافەکانیان، هەنگاوێکی دیكەی فشارەکانی دەسەڵات بۆ بە زۆر کردنەوەی دەرگاکانی خوێندن لە سەرجەم شار و شارۆچکەکان، شکستی پێهێنرا.
دووپاتیشیدەكاتەوە، “رێگای کردنەوەی دەرگای خوێندنگەکان فشار و هەڕەشە نییە، بەڵکو جێبەجێکردنی داواکارییەکانە”.
ئەنجومەنەكە باس لەوەشدەكات، بایکۆتیان کردووە تا جارێکی دیكە بایکۆت نەکەنەوە. بۆیە تا وەڵامێکی کرداریی دڵنیاکەرەوە وەرنەگرن، بەردەوام دەبن و لە نزیکترین دەرفەتدا لە شەقام دەبن.
بەپێی ساڵنامەی خوێندن کە لەلایەن بەڕێوەبەرایەتیی گشتیی پەروەردەی سلێمانییەوە بڵاوکرایەوە دەبوایە ئەمڕۆ یەکەم رۆژی دەستپێکردنەوەی خوێندن بێت و خوێندنگەکان دەوامیان تێدا بکرێت، بەڵام هەموو مامۆستایان نەچوونەتەوە بۆ خوێندنگەکان و لە هەندێک خوێندنگە چەند مامۆستایەک چوونەتەوە بەمەبەستی پەیوەندیکردنەوە.
دوای تێپەڕبوونی وەرزێکی خوێندن بە بایکۆت و نەبوونی دەوام، مامۆستایانی ناڕازی سنووری سلێمانی و راپەڕین و گەرمیان و هەڵەبجە لەماوەی رابردوو داوای جێبەجێکردنی 5 خاڵی سەرەکییان لە حکومەت کردبوو، وەزارەتی پەروەردە لە رۆژی ٧ی ئەم مانگە نووسراوێکی بڵاوکردەوە و تێیدا ئاماژەی بەوەکرد، پاش گفتوگۆكردن لەگەڵ ئەنجومەنی وەزیران، رەزامەندی هەیە كە پاش هەمواركردنەوەی یاسای بودجەی فیدراڵی و ناردنی شایستە داراییەكانی هەرێمی كوردستان:
1- پلە بەرزكردنەوە لەچوارچێوەی یاسا بەركارەكان دەستپێدەكات.
2- بەگرێبەستكردنی مامۆستایانی وانەبێژی دانەمەزراو بەگوێرەی رێنماییەكانی وەزارەتی دارایی و ئابوری، بکرێت.
دواتریش ئەم نووسراوە کاردانەوەی دروستکرد و مامۆستایانی ناڕازی نووسراوەکەیان رەتکردەوە و دووپاتیانكردەوە کە بایکۆت ناشکێنن و ناگەڕێنەوە بۆ خوێندنگەکان تا ئەوکاتەی حکومەت بە روونی وەڵامی داواکارییەکانیان نەداتەوە.
