وتەبێژی بەڕێوەبەرایەتیی هاتوچۆی سلێمانی روونكردنەوە لەبارەی خستنەكاری كامێراكانی تۆماركردنی خێرایی دەدات و رایدەگەیەنێت، وادەیەك بۆ كارپێكردنی كامێراكانی تۆماركردنی خێرایی دیاری نەكراوە جگە لە رێگای تاسڵوجە – دوكان و لە هەر شەقامێك كامێراكان بكەونەكار پێشوەختە شۆفێران ئاگاداردەكرێنەوە.
بەهمەن عەبدوڵا وتەبێژی بەڕێوەبەرایەتیی هاتوچۆی سلێمانی لە لێدوانێكدا بە تۆڕی میدیایی ئێستای راگەیاند، وادەیەك بۆ كارپێكردنی كامێرای دیكەی تۆماركردنی خێرایی دیاری نەكراوە و هیچ كامێرایەك نەكەوتووەتەكار جگە لە رێگای تاسڵوجە – دوكان وتیشی، ” لە هەر رێگاوبان و شەقامێك كامێراكان بكەونە كار پێشوەختە شۆفێران لە شوێن و خێرایی رێگاپێدراو ئاگاداردەكەینەوە”.
وتەبێژی هاتوچۆی سلێمانی راشیگەیاند، ” لە ئێستادا تەنها رێگای تاسڵوجە – دوكان كاردەكات داوا لە شۆفێران دەكەین پابەندی یاسا و رێنمایەكانی هاتوچۆبن”.
