سەرپەرشتیاری كەركوك ــ سەڵاحەدینی یەكێتیی نیشتمانیی كوردستان رایدەگەیەنێت، “رێگانادەین ستەم لە دانیشتووانی گەڕەكی نەورۆزی كەركوك بكرێت و دەشڵێت، “لە رێگای یاساوە چارەسەری كێشەی دانیشتووانی ئەو گەڕەكە دەكەین”.
ئەمڕۆ یەكشەممە، ئاسۆ مامەند و شاڵاو كۆسرەت رەسوڵ لەگەڵ ژمارەیەك لە ئەندامانی سەركردایەتیی یەكێتی گەیشتنە گەڕەكی نەورۆز و لە كۆنگرەیەكی رۆژنامەوانیدا كە پەیامنێری تۆڕی میدیایی ئێستا ئامادەیبوو، ئاسۆ مامەند سەرپەرشتیاری كەركوك ــ سەڵاحەدینی یەكێتیی نیشتمانیی كوردستان رایگەیاند، دڵنیاتان دەكەینەوە لەگەڵتان دەبین و ئەم كێشەیە بە رێگای یاسایی چارەسەر دەكەین و بڕیارە سەرۆك بافڵ سەردانی بەغداد دەكات و ئەو كێشەیە لەگەڵ بەرپرسانی بەغداد تاوتوێدەكات.
وتیشی، “رێگانادەین هاوڵاتییان لەم گەڕەكە ماڵەكانیان چۆڵبكرێت و دانیشتووانی ئەم گەڕەكە خۆڕاگرن و دانوستانیش بۆ پێكهێنانی حكومەتی خۆجێی كەركوك لە چەند رۆژی داهاتوودا دەستپێدەكات و پێویستە كورد لە كەركوك یەكڕیزبێت”.
