ژمارەیەك لە وڵاتانی ئەفریقا ویستی خۆیان بۆ هاوردەكردنی پەتاتەی هەرێم دەربڕیوە.
شەیما جەمال كوێخا، راوێژكاری وەزارەتی كشتوكاڵ و سەرچاوەكانی ئاو رایگەیاند، پارێزگاكانی هەرێم لە ساڵی رابردوودا سەركەوتوو بوون لە هەناردەكردنی بەرهەمە جۆراوجۆرەكان و بەروبوومە كشتوكاڵییە خوازراوەكان بۆ وڵاتانی یەكێتیی ئەوروپا و ژمارەیەك وڵاتی عەرەبی.
شەیما لە لێدوانێكدا وتیشی، “ژمارەیەك وڵاتی ئەفریقیش ویستی خۆیان بۆ هاوردەكردنی بەرهەمی پەتاتە لە هەرێمەوە نیشانداوە”.
بەرهەم و بەروبوومە كشتوكاڵییەكان پێویستیان بە هەندێك كات هەیە بۆ هەناردەكردن، چەند قۆناغێك هەیە كە پرۆسەی هەناردەكردن پیایدا تێپەڕدەبێت، هەر قۆناغێك پێویستی بە ئامادەكردن و لە پاكەت-نان و خستنەڕووی بۆ لیژنەی فەرمانگەی پاراستنی كشتوكاڵی هاوبەشی نێوان هەرێم و ناوەند هەیە بەمەبەستی پشكنین، بۆ دڵنیابوونەوە لەوەی لە چوارچێوەی پێوەرە پێوانەییە خوازراوەكانی هەناردەكرندایە، راوێژكارەكەی وەزارەتی كشتوكاڵ وای وت.
لە ماوەی رابردوودا هەنار، پەتاتە و هەندێك بەرهەمی دیكەی كشتوكاڵیی هەرێم رەوانەی وڵاتانی عەرەبی و ئەوروپا كران.
