وتەبێژی حكومەتی هەرێم رایدەگەیەنێت، شەوی رابردوو بە دوو درۆنی بۆمبڕێژكراو هێرشكرایەسەر بارەگایەكی هێزی پێشمەرگە لە پیرمام.
پێشەوا هەورامانی، وتەبێژی حکومەتی هەرێمی کوردستان رایگەیاند، كاتژمێر 11:45 خولەكی شەوی رابردوو 30ی كانونی یەكەم بە دوو درۆنی بۆمبرێژکراو هێرشکرایەسەر بارەگایەکی هێزی پێشمەرگەی کوردستان لە سنووری پیرمام- هەولێر، کە خۆشبەختانە زیانی گیانی نەبووە و تەنیا زیانی ماددی لێکەوتەوە.
وتیشی، “ئەم هێرشە تیرۆریستییە لەلایەن هێزێکی لە یاسا دەرچوو بە چاوساغی و هاوکاریی جاش و هاوکارەکانیان بۆ سەر بنکەیەکی هێزی پێشمەرگە مەترسیدار و شەڕ فرۆشتنە”.
هەورامانی لە راگەیەندراوێكدا ئەوەشدەخاتەڕوو، “ئێمە ئەو لایەنانە و حکومەتی فیدراڵ بە بەرپرس دەزانین بەرامبەر ئەم هێرشە ترسنۆکانەیە، چونکە ئەم گروپە لە یاسا دەرچووانە لەلایەن حکومەتی فیدراڵی بودجە و مووچەیان پێدەدرێت و چەکدار دەکرێن و بە بەرچاوی حکومەتی عێراقەوە هاتوچۆ دەکەن و چەک و موشەک و درۆن دەگوازنەوە و هێرشی تیرۆریستی دەکەنە سەر دامودەزگا فەرمی و سەربازییەکان”.
“لە کاتێکدا کە حکومەتی عێراق بێ دەنگ و بێ توانایە بەرامبەریان، بەڵام ئازایە لە بڕینی قوتی خەڵکی کوردستان و بە هەمان پارە ئەم گروپانە پارەدار دەکرێن” وەك ئەوەی لە بەشێكی دیكەی راگەیەندراوەكەی وتەبێژی حكومەتدا هاتووە.
ئەوەش دەڵێت، چاوەڕوانی وەڵام و هەنگاوی کرداری لە سەرۆک وەزیرانی حکومەتی فیدراڵی دەکەین لە سزادانی ئەم گروپانە و، هەر وەڵامدانەوەیەکیش لە کات و ساتی گونجاودا بە مافی خۆمان دەزانین. داواش لە هەموو دۆست و لایەنەکان دەکەین کە لەو کردارە تیرۆریستییە بێدەنگ نەبن و پشتیوانمان بن بۆ هەر بەرپەرچدانەوەیەک کە بە گونجاوی بزانین.
