دەزگای ئاسایشی هەرێم دەستگیركردنی چوار تۆمەتبار لە دوو چالاكیی هێزەکانی ئاسایشی رۆژئاوای سلێمانی رادەگەیەنێت.
دەزگای ئاسایشی هەرێم لە راگەیەندراوێكدا روونیكردەوە، لە چالاکیی یەکەمدا، لە دوای بەدەستهێنانی زانیاری و بەدواداچوون، لەسەر فەرمانی داوەری لێکۆڵینەوە، سێ کەس بە تۆمەتی دزیکردن لە ماڵێکی گەڕەکی سەرچناری سلێمانی دەستگیرکران.
دەشڵێت، لە چالاکیی دووەمدا، هێزەکانی ئاسایش دوای کۆکردنەوەی زانیاری و دەستنیشانکردنی شوێنی تۆمەتبار، لەسەر فەرمانی دادوەری لێکۆڵینەوە و دوای کەمتر لە 12 کاتژمێر لە رووداوەکە، تۆمەتباری رووداوی تەقەکردنی لە ماڵێک لە شارۆچکەی بازیان دەستگیرکرد و دەستیانگرت بەسەر چەکێکدا.
دەزگاكە دووپاتیشیدەكاتەوە، “هێزەکانمان لە چوارچێوەی هەوڵەکانی دەزگای ئاسایشی هەرێم بۆ بنبڕکردنی حاڵەتی دزیکردن و تەقەکردن و چەکی بێمۆڵەت بەردەوامن، لەپێناو زیاتر بەرقەراکردنی ئارامی و ئاسایش”.
لەئێستادا تۆمەتباران بە ماددەکانی (443) و (405) بەفەرمانی دادوەری لێکۆڵینەوەی ئاسایش راگیراون و لێکۆڵینەوە لە دۆسیەکانیان بەردەوامە، وەك ئەوەی لە راگەیەندراوەكەدا هاتووە.
