بافڵ جەلال تاڵەبانی سەرۆکی یەکێتیی نیشتمانیی کوردستان رایگەیاند، گرنگیدان بە پرسە نەتەوەیی و نیشتمانییەكان كاری لەپێشینەمانە و لەسەروو هەموو بەرژەوەندییە حزبییەكانەوەیە، یەكخستنی دەنگی كورد، تەبایی و كاری پێكەوەییش ئامانجمانە.
بافڵ جەلال تاڵەبانی سەرۆکی یەکێتیی نیشتمانیی کوردستان لە سلێمانی پێشوازیی لە کڵاوس دیتەر کونسوڵی گشتیی ئەڵمانیا لە هەرێمی كوردستان کرد و لە کۆبوونەوەیەکدا پەرەپێدانی پەیوەندییەكانی نێوان هەردوولا و فراوانكردنی هاریكاری و هەماهەنگییەكان لەخزمەت بەرژەوەندییە باڵاكاندا جەختیلێكرایەوە.
لەدرێژەی دیدارەكەدا دۆخی سیاسیی ناوچەكە و بەتایبەت كەركووك گفتوگۆی لەبارەوەكرا و بافڵ جەلال تاڵەبانی رایگەیاند، گرنگیدان بە پرسە نەتەوەیی و نیشتمانییەكان كاری لەپێشینەمانە و لەسەروو هەموو بەرژەوەندییە حزبییەكانەوەیە، یەكخستنی دەنگی كورد، تەبایی و كاری پێكەوەییش ئامانجمانە.
لەبارەی بەڕێوەچوونی هەڵبژاردن لە هەرێم لە وادەی دیاریكراوی خۆیدا، بافڵ جەلال تاڵەبانی پێویستیی ئەنجامدانی هەڵبژاردنێكی بێگەردی لەوادەی خۆیدا دووپاتكردەوە و وتی، هەوڵەكانمان بۆ چارەسەركردنی كێشەكان و تێپەڕاندنی بەربەستەكانی بەردەم ئەم پرۆسە دیموكراسییە بەردەوامە.
