جێگری بەڕێوەبەری گشتیی پەروەردەی سلێمانی رایدەگەیەنێت، “پشتیوانیمان لە داواکارییەکانی مامۆستایان کردووە و یەکێک لە بژاردەکان دوای دەستپێکردنەوەی دەوام کەمکردنەوەی پڕۆگرامی خوێندنە”.
عومەر محەمەد، جێگری بەڕێوەبەری گشتیی پەروەردەی سلێمانی لە چاوپێکەوتنێکدا ئەوەی خستەڕوو، “پشتیوانیمان لە داواکارییەکانی مامۆستایان کردووە و پەیامەکانیان گەیشتووەتە حکومەتی هەرێم و عێراق، لە هەمان کاتیشدا ئێمە بەرپرسیارین بەرامبەر بە خوێندکاران و پڕۆسەی خوێندن و پشتیوانی لەوانیش دەکەین”.
سەبارەت بە گرتنەبەری رێوشوێنی ئیداری دژی بایکۆتکردنی مامۆستایان ئاماژەی بەوەکرد، “تا ئێستا هیچ بڕیارێک لەو بارەیەوە نەدراوە”.
جێگری بەڕێوەبەری گشتیی پەروەردەی سلێمانی سەبارەت بە پڕۆگرامی خوێندن دەڵێت، “یەکێک لە بژاردە بەهێزەکان کەمکردنەوەی پڕۆگرامی خوێندنە و بژاردەیەکیتریش هەیە ئەویش درێژکردنەوەی کاتی خوێندنە بەڵام ئەگەرێکی لاوازە”.
جەخت لەوەش دەکاتەوە، “بەرنامەیەکی زۆر باش دانراوە بۆ قەرەبووکردنەوەی پڕۆگرامی خوێندن کە لە خزمەتی خوێندکاراندایە، بەڵام چاوەڕێی دەستپێکردنی پڕۆسەی خوێندن دەکرێت و لە ماوەی 10 رۆژدا ئەو بەرنامەیە رادەگەیەندرێت”.
