ئاسایشی هەولێر دەستبەسەراگرتنی زیاتر لە 2.5 كیلۆگرام ماددەی هۆشبەر و دەستگیركردنی پێنج تۆمەتبار رادەگەیەنێت كە یەكێكیان داواكراوی نێودەوڵەتییە.
بەڕێوەبەرایەتیی نەهێشتنی مادە هۆشبەرەکان رایگەیاند، لە رۆژانی 21 و 22ی تشرینی دووەم لە سێ چالاکیی سەرکەوتوودا، پێنج تۆمەتبار دەستگیركران كە كاری کڕین و فرۆشتن بە ماددەی هۆشبەر دەکەن و، یەکێکیان داواکراوی نیودەوڵەتییە.
ئەوەشی خستەڕوو، لەو چالاكییانەدا بڕی (دوو کیلۆ و شەش سەد گرام) ماددەی هۆشبەر لە جۆری کریستاڵ دەستی بەسەرداگیراوە.
پەڕاوی لێکۆڵینەوە بۆ تۆمەتباران کراوەتەوە و بەپێی یاسای بەرەنگاربوونەوەی ماددە هۆشبەر و کارتێکەرە ئەقڵیەکان مامەڵەیان لەگەڵدا دەکرێت، بەڕێوەبەرایەتییەكە وادەڵێت.
