حکومەتی هەرێم رایدەگەیەنێت، “ئەنجومەنی وەزیرانی هەرێمی کوردستان کۆبوونەوەی ئاسایی خۆی دەکات و چەند بابەتێک گفتوگۆی لەبارەوە دەکرێت”.
لە راگەیەندراوێکدا فەرمانگەی میدیا و زانیاریی حکومەتی هەرێم ئاماژە بەوە دەکات، “رۆژی چوارشەممە، 22ی تشرینی دووەمی 2023، ئەنجومەنی وەزیرانی هەرێم، بە سەرپەرشتی مەسرور بارزانی سەرۆکی حکومەت و ئامادەبوونی قوباد تاڵەبانی، جێگری سەرۆکی حکومەت کۆدەبێتەوە”.
ئەوەشی خستووەتەڕوو، “لە بڕگەی یەکەمی کۆبوونەوەکەدا ئەنجومەنی راژەی گشتی، راپۆرتێک سەبارەت بە میلاکی گشتی حکومەتی هەرێم و دەرەنجامی پرۆسەی وردبینی هاوبەشی هەردوو دیوانی چاودێری دارایی فیدراڵ و کوردستان دەخاتەڕوو”.
دەشڵێت، “بڕگەی دووەمی کۆبوونەوەکە، تایبەت دەبێت بە خستنەڕووی کۆنووسی کۆبوونەوەی هاوبەشی وەزیری داد و وەزیری هەرێم بۆ کاروباری پەرلەمان و سەرۆکی ئەنجومەنی شورای هەرێمی کوردستان، تایبەت بە دیاریکردنی چوارچێوەی یاسایی ئەو یاسا و بڕیارانەی پەڕلەمانی کوردستان، کە لە دوای 6ی تشرینی دووەمی 2022، کەوتوونەتە بواری جێبەجێکردن”.
سەبارەت بە بڕگەی کۆتایی فەرمانگەی میدیا و زانیاریی ئەوەی ئاشکراکرد، “لە بڕگەی سێیەم و کۆتاییدا، دوو بابەت دەخرێنەڕوو سەبارەت بە جێبەجێكردنی بڕگە و ماددەکانی یاسای چاکسازیی، کە لەسەر راسپاردەی نووسینگەی سەرۆکی حکومەت پێشنیاز کراوە بخرێتە بەردەم ئەنجومەنی وەزیران”.
