مستەفا کازمی، سەرۆکوەزیرانی عێراق دەڵێت، “ساڵی 2021 لەڕووی ئاسایش و ئارامییەوە باشتر دەبێت.”
مستەفا کازمی، سەرۆکوەزیرانی عێراق ئەمڕۆ چوارشەممە 30ی كانونی یەكەم بەشداری لە “کۆنگرەی ساڵانەی فەرماندەیی ئۆپەراسیۆنە هاوبەشەکان”دا كرد و لە وتارێكدا وتی، “ساڵی 2020 ساڵی سەركەوتنی تەواوەتی بەسەر داعش و داخستنی دەروازەكانی گەشەكردنی و بڕینی ڕێگەی هەوڵە قێزەونەكانی بوو، ساڵی 2021ـیش ساڵی پابەندبوون و لایەنگریی هێزە ئەمنییەکان بۆ دەوڵەت دەبێت، بۆیە لە پێگەیاندنی ئەندامانی هێزە ئەمنییەکاندا کار لەسەر ئەو باوەڕ و بنەمایە دەکەین.”
بە گوێرەی ڕاگەیاندراوی نووسینگەی سەرۆكوەزیران، كازمی بە پێویستی زانیوە هەوڵە هەواڵگیرییەكان بەهێزتر بكرێن لەپێناو لەناوبردنی تیرۆر و تاوان و پێیوابووە كە هێشتا ئاستەنگییەکانی دۆخی ئەمنی بەردەوامییان هەیە، لەوانە کۆنتڕۆڵکردنی چەکی دەرەوەی یاسا و دەوڵەت.
سەرۆکوەزیرانی عێراق لە كۆنگرەكەدا ڕایگەیاندووە، “نابێت ناکۆکی و کاری تاكەكەسی و خۆبەخۆ ببێتە هۆی پەرتكردنی ڕیزی هێزە ئەمنییەكان و دەبێت هەمووان پابەندی ئەو کارنامەیەبن کە فەرماندەیی ئۆپراسیۆنە هاوبەشەکان دایڕشتووە، چونكە هەموو هەرەسهێنانی سوپاكانی جیهان، بەهۆی پەرتەوازەییەوە بوون.”
سەبارەت بە هەڵبژاردنی پەرلەمانیی پێشوەخەتە، كازمی وتویەتی، “ئەركی پاراستنی هەڵبژاردنمان لەبەردەمدایە و دەبێت هەمووان لە ئێستاوە كاربكەن بۆ ڕەخساندنی زەمینەیەكی ئارام بۆ هەڵبژاردنی ساڵی 2021.”
