دەزگای ئاسایشی هەرێم دەستگیرکردنی پێنج گروپ و تاقمی تیرۆریستی دا-عش لە هەرێم رادەگەیەنێت، هاوکات سێ ئەمیریش دەستگیردەکرێت و شکست بەمەرامەکانیان دەهێنرێت کە پیلانیان دانابوو لە چەندین شاری هەرێم کردەوەی تیرۆریستی ئەنجامبدەن.
لەو بارەیەوە بەڕێوەبەرایەتیی ئۆپەراسیۆنەکانی دەزگای ئاسایشی هەرێم ئاماژە بەوە دەکات، “لەبەرئەنجامی بەدواداچوونی ورد و چاودێری دۆخی ئەمنی هەرێم کوردستان زانیاری سەرەتایی دەست هێزەکانی دەزگای ئاسایشی هەرێم کەوت کە تیرۆریستانی دا-عش پیلانیان داناوە بۆ ئەنجامدانی چەندین کردەوەی تیرۆریستی لەچەند شار و ناوچەیەکی جیاجیا”.
ئەوەشی خستۆتەڕوو، “پاش رەزامەندی سەرۆکی دەزگای ئاسایشی هەرێم لە هەریەک لە شارەکانی سلێمانی، گەرمیان، هەڵەبجە، شارەزوور و ناوچە دابڕێندراوەکان ژووری ئۆپەراسیۆن پێکهێنرا و دەستبەکاربوون بۆ کۆکردنەوەی زانیاری و چاودێریکردنی هەموو جموجۆڵەکانی تیرۆریستانی دا-عش”.
دەشڵێت، “سەرئەنجام پاش پێنج مانگ کارکردنی بەردەوام و شەونخونی هێزەکانمان پشت بەستوو بە بەڵگە و زانیاری وردیان لەسەر شانە نەنوستووەکانی تیرۆریستانی دا-عش دەستکەوت و تەواوی جموجۆڵەکانیان لە شارەکانی هەرێم خرانە ژێر چاوێری وردەوە و دواتر ناسنامەی ئەندامانی گروپەکان و شوێن و مانەوەیان دەستنیشانکران”.
سەبارەت بە ئۆپەڕاسیۆنەکانیان بەڕێوەبەرایەتیی ئۆپەراسیۆنەکانی دەزگای ئاسایشی هەرێم دەڵێت، “دوای رەزامەندی دادوەری لێکۆڵینەوەی ئاسایش لە دەیان ئۆپەراسیۆندا 55 تیرۆریست کە ئەندامی تۆڕ و گروپە نەنوستووەکانی دا-عش بوون لە کەرکوک، سلێمانی، گەرمیان، هەڵەبجە، سەیدسادق، شارەزوور و پێنجوێن دەستگیرکران کە سیانیان ئەمیر و تیرۆریستی هەرەتاوانبارن”.
جەخت لەوەش دەکاتەوە، “لە سەرجەم هەڵمەتەکاندا دەستگیرا بەسەر چەندین پارچە چەک و مەوادی تەقەمەنی و خۆکوژی و خۆپارێزی تەواوی ئەندامانی تاقم و گروپە تیرۆریستییە دەستگیرکراوەکانیش مەرامیان بوو دوای ئەنجامدانی کردەوە تیرۆریستییەکانیان بچنە ناو چەکدارانی دا-عشەوە، هاوکات لەبەر سەلامەتی رێڕەوی لێکۆڵینەوەکان و هەستیاری کەیسەکە، بەشێک لە زانیارییەکان بە شاراوەیی هێڵرانەوە”.
بەڕێوەبەرایەتیی ئۆپەراسیۆنەکانی دەزگای ئاسایشی هەرێم دەشڵێت، “ئاشکراکردنی ئەم پێنج شانە نەنوستووەی تیرۆریستانی دا-عش و شکستهێنان بە مەرامەکانیان و دەستگیرکردنی ئەندامەکانیان، بەرئەنجامی زیاتر لە 150 رۆژ کارکردنی بەردەوامی بەڕێوەبەرایەتیی ئۆپەراسیۆنەکانی دەزگای ئاسایشی هەرێمە کە هەمیشە ئامادەییان هەیە و لە هەوڵدان بۆ پاراستنی ئارامی هەرێم”.
ئاماژە بەوەش دەکات، “ئاسایش و سەقامگیری هەرێمی کوردستان لەپێشینەی کارکردنی هێزەکانمانە، وەک هەمیشە سوپاسی بێ پایانیش ئاڕاستەی کۆمەڵانی خەڵکی کوردستان دەکەین کە هاوکارمان بوون و لە پشت سەرخستنی کردە ئەمنی و هەواڵگری و سەربازییەکانمانەوەن، پشتیوان بە خوای گەورە، بە هاوکاری ئێوەی دڵسۆز ناهێڵین هیچ پیلانێک ژیان لە خەڵکی خۆشەویستی خۆمان تێکبدات”.
