تەندروستیی سلێمانی دەڵێت، ئەو دەرمانەی ئێواران لە بەشێكی گەڕەكەكان دەڕشێندرێت مەترسی بۆسەر مرۆڤ نییە.
بەڕێوبەرایەتیی گشتیی تەندروستیی سلێمانی لە روونکردنەوەیەكدا رایگەیاند، هاوڵاتیانی سلێمانی دڵنیادەکاتەوە لەوەی ئەو دەرمانەی لە شێوەی دوکەڵە و لە بەشێك لە گەڕەکەکانی سلێمانی دەڕشێنرێت، سەلامەتە و هیچ مەترسییەکی بۆ مرۆڤ نییە.
دەشڵێت، دەرمانەكە كە لەلای زۆرێك لە هاوڵاتیان بە دوکەڵی مێشەکە ناسراوە، ناوە زانستییەکەی بریتییە لە کەی ئۆسرین (دیلتامیسرین) و بەکاردێت بۆ لەناوبردنی مێشوولەی گوازەرەوەی مەلاریا و نەخۆشی لیشمانیا و بەسوودە بۆ لەناوبردنی مێش و مێرووە زیانبەخشەکانی دیکە.
لەم وەرزەدا و لە کاتی ئێواران ئەو دەرمانە دەڕشێنرێت بۆ لەناوبردنی ئەو مێشولانەی نەخۆشی دەگوازنەوە، تەندروستیی سلێمانی وادەڵێت.
