قوباد تاڵەبانی لە کۆنفڕانسی مید هەردوو پڕۆژەی سمارت سولی و کۆڕبەندێکی تەکنەلۆژی گەنجانەی راگەیاند و وتی، “هەنگاوێکی دروست دەنێین بەرەو شۆڕشی داتا”.
قوباد تاڵەبانی، جێگری سەرۆکی حکومەتی هەرێمی کوردستان لە میانەی وتارێکیدا لە یەکەمین کۆنفڕانسی مید بۆ گەشەپێدان ئاماژەی بەوە کرد،”کوردستان نابێتە وڵاتێکی گەشەسەندوو و خاوەن ئابورییەکی تۆکمە و سەقامگیر ئەگەر مۆدێلێک لە حکومڕانی و گەشەپێدانی ناوچەیی جێبەجێنەکەین کە تێیدا سامان و توانا مرۆیی و سروشتییەکانی شارۆچکە و ناحیە و گوندەکانیش نەخرێنە خزمەت گەشەپێدانەوە”.
ئەوەشی خستەڕوو، “ئەمڕۆ لە یادی دامەزراندنی سلێمانیدا و لەپاڵ ئەو شۆڕشی داتایەی دەستمان پێکردووە، دوو پڕۆژەی دیکەش رادەگەیەنین کە ئەوانیش، پڕۆژەی سمارت سولیە لەگەڵ کۆڕبەندێکی گەنجانەی تەکنەلۆژی بۆ داهێنان و کارسازی”.
جێگری سەرۆکی حکومەتی هەرێمی کوردستان لەبارەی پڕۆژەی سولی سمارتەوە وتی، “ئامانجمان ئەوەیە لە رێگای ئەم پڕۆژەیەوە هاوڵاتییان بەشداربن لە چارەسەرکردنی کێشەکان و گەشەپێدانی کۆمەڵگادا، هاوکات ئەو پڕۆژەیە دەتوانێت ئەڵقەیەک بێت لە نێوان کەرتی گشتی و تایبەت و زانکۆکان و ناوەندە ئەکادیمییەکان و هاوڵاتییان، هەروەها لەو رێگایەوە کێشە بنەڕەتییەکانمان باسدەکەین و داوا دەکەین هاوڵاتییان بەگشتی و گەنجان و کۆمەڵگای تەکنەلۆژی بەتایبەتی بەشداری کارایان هەبێت لە چارەسەرکردنی ئەو کێشانەدا”.
راشیگەیاند، “کۆڕبەندی تەکنەلۆژی بۆ داهێنان و کارسازی دەبێتە کۆڕبەندێک بۆ دۆزینەوەی چارەسەری زیرەک بۆ کێشەکانی بەردەم داهێنان و کارسازی لە کوردستان”.
لە کۆتایی وتارەکەیدا قوباد تالەبانی وتیشی، “کۆنفڕانسی مید هەنگاوێکی دروستە بەرەو شۆڕشی داتا و هەردوو ئەو پرۆژەیەی کە راگەیەندرا بەیەکەوە تەواوکەری پڕۆژەکانی خزمەت و چاکسازین لە حکومڕانی لە کوردستان کە یەکەم هەنگاوی بە پڕۆژەی بایۆمەتری دەستیپێکرد و بووە هەنگاوێک کە بۆ یەکەم جار حکومەتی هەرێم ببێتە خاوەن داتایەکی ورد و دروست و پشتڕاستکراو”.
