لێخۆشبوونی 15%ی قەرزی کارەبا پۆلەکانی (بازرگانى ، پيشەسازى ، كشتوكاڵى ، حكومى) رۆژی 28ی ئەم مانگە کۆتایی دێت، هاوبەشان ئاگادار دەکرێنەوە بۆ سودمەندبوون لە لێخۆشبوونەکە، هەتاکو ئەو بەروارە سەردانی بەڕێوەبەرایەتییەکانی دابەشکردنی کارەبا بکەن.
به‌ڕێوه‌به‌رایه‌تیی گشتیی کارەبای سلێمانی، لە راگەیاندراوێکدا بڵاویکردەوە، لێخۆشبوونی 15%ی قەرزی کەڵەکەبووی پارەی کارەبا بۆ هەر یەک لە پۆلەکانی (بازرگانى ، پيشەسازى ، كشتوكاڵى ، حكومى) بەرواری 28ی ئابی 2023بۆ ماوەی سێ مانگ دەستیپێکرد و بەروارى 28ی تشرینی دووەم کۆتایی دێت.
بەڕێوەبەرایەتییەکە دەڵێت، “داوا لە هاوبەشانى بازرگانی و پیشەسازی و کشتوکاڵی دەکەین، ئەوانەى دەیانەوێت سوودمەندبن لە داشکاندنى 15%ى قەرزى کارەبا پێویستە تا بەروارى 28ی تشرینی دووەمی 2023 سەردانی بەڕێوەبەرایەتییەکانی دابەشکردنی کارەبا بکەن بۆ ئەوەی لەو بڕیارە سوودمەندبن” .
پەیوەست به پۆلى ماڵان، بەڕێوەبەرایەتییەکە ئاماژە بەوە دەکات،” لێخۆشبوونەکە بەروارى 23 ی تشرینی یەکەمی 2023 کۆتایی هاتووە و نەماوە”.
