بەپێی ڕاپۆرتێكی نوێ دە كارەساتی ئاووهەوا بووەتە هۆی زیانی مێژوویی گەورە، بۆیە ساڵی 2020 بەمێژوویی دادەنرێت لەڕووی بڕی ئەو زیانانە كە 150 ملیار دۆلاری تێپەڕاندووە.
جگە لەوەی كارەساتەكانی ئاووهەوا بووەتە هۆی گیان لەدەستدانی لانی كەمی 3500 كەس و ئاوارەبووانی زیاتر لە 13.5 ملیۆن كەس، كارەساتەكانیش هەریەك لە سوتانی دارستانەكان لە ئوسترالیا و كالیفۆرنیا و باهۆزەكانی زەریای ئەتڵەسی لەخۆدەگرێت.
بەپێی ڕاپۆرتێكی كۆمەڵەی كریستیان ئەیدی خێرخوازی كە پشت بە توێژینەوە دەبەستێت و مانگی ڕابردوو بڵاوبووەوە، تەنها 4%ی زیانە ئابورییەكان بەهۆی ئەو كارەساتانە لە وڵاتە هەژارەكاندا بیمە كراون، بەراورد بە 60% لە وڵاتە دەوڵەمەندەكاندا.
كات كرامر، بەرپرسی سیاسەتی ئاووهەوا لە ڕێكخراوی كریستیان ئەید وتی، لافاو بێت لە ئاسیا یان كولـلە لە ئەفریقا یاخود گەردەلول لە ئەوروپا و ئەمریكا، گۆڕانی ئاووهەوا بەردەوام بوو لە دەرخستنی ساڵی 2020.
بە شێوەیەكی سروشتی كارەساتەكان بەر مرۆڤایەتی كەوتوون بە ماوەیەكی زۆر پێش دەستپێكردنی قەتیسبوونی گەرما كە سیستمی ئاووهەوای هەسارەكە تێكدەدات.
بەڵام زیاتر لە سەدەیەكی زانیارییەكان سەبارەت بە پلەكانی گەرما و بارینی باران، هاوشانی دەیەیەك لە زانیاری مانگە دەستكردەكان سەبارەت بە باهۆزەكان و بەرزبوونەوەی ئاستی دەریا، هیچ بوارێكی گومانكردنیان نەهێشتووەتەوە لەوەی بەرزبوونەوەی پلەی گەرمای ڕووی زەوی كاریگەرییەكەی زیاددەكات.
لەئێستادا پێشبینی دەكرێت باهۆزەكان بەهێزتربن لە ڕابردوو و بۆ ماوەیەكی زیاتر بەردەوامبن و بارانی زیاتریان پێوەبێت.
پێنج لە زۆرترین كارەساتە زیان بەخشەكانی ساڵی 2020 پەیوەندیدار بوون بە بای وەرزی باراناوی نائاسایی لە ئاسیا.
سوتانی دارستانەكان لە ڕوبەرێكی فراوانی كالیفۆرنیا و ئوسترالیا و تەنانەت لە ناوچە دابڕاوەكانی سیبیریا لە ڕوسیا، كە زۆرینەیان دەكەونە بازنەی جەمسەری باكوورەوە، قەتیسبوونی گەرما دووپاتدەكەنەوە، پێشبینیش دەكرێت بەرەو خراپتر بڕوات هاوكات لەگەڵ بەرزبوونەوەی پلەكانی گەرما.
بەرزبوونەوەی ناوەندی پلەی گەرمای ڕووی زەوی بە لانیكەم 1.1 پلەی سەدی بوو بەراورد بە كۆتاییەكانی سەدەی نۆزدە، لەگەڵ ڕودانی زۆرینەی ئەم گەرمایە لە نیوەی سەدەی ڕابردوودا.
