بە تۆمەتی ئەنجامدانی نوشتە و جادوو، لە پارێزگای هەڵەبجە و قەزای بازیان دوو کەس دەستگیرکران، دەستیش بەسەر چەکێکی بێمۆڵەت و چەندین کەرەستە و پارچە جل و بەرگدا گیرا کە بۆ مەبەستی نوشتەکردن بەکارهێنرابوون.
دەزگای ئاسایشی هەرێم بڵاویکردەوە، بەڕێوەبەرایەتیی ئاسایشی شارەزوور و بەڕێوەبەرایەتیی ئاسایشی ڕۆژئاوای سلێمانی لە پارێزگای هەڵەبجە و قەزای بازیان دوو کەسیان بەتۆمەتی فریودان و ئەنجامدانی نوشتە و جادو دەستگیرکرد.
دەزگای ئاسایشی هەرێم دەڵێت، ئەو دوو کەسە هەوڵیاندابوو لەڕێگەی ( سحر و نوشتە و جادو ) هاوڵاتیان فریوبدەن و ببنە هۆکارێک بۆ تێکدانی خێزان و پەیوەندییە کۆمەڵایەتیەکان.
باس لەوەش دەکات، لەکاتی دەستگیرکردنی تۆمەتباران دەستگیرا بەسەر چەکێکی بێمۆڵەت و چەندین کەرەستە و پارچە جل و بەرگ کە بۆ مەبەستی نوشتەکردن بەکارهێنرابوون، لە ئێستادا تۆمەتباران بە ماددەی (240) لەیاسای سزادان ڕاگیراون و لێکۆڵینەوە لە دۆسیەکانیان بەردەوامە.
