وتەبێژی یەکێتیی خانەنشینانی کوردستان رایدەگەیەنێت، “پشتگیری خۆمان بۆ داواکارییە رەواکانی مامۆستایان لە هەرێمی کوردستان رادەگەیەنین”.
سادق عوسمان، وتەبێژی یەکێتیی خانەنشینانی کوردستان لە لێدوانێکی رۆژنامەوانیدا سەبارەت بە گردبوونەوەکانی مامۆستایان ئاماژەی بەوەکرد، “وەک نوێنەری خانەنشینانی شارستانی و یاسای لە کوردستان پشتگیری خۆمان بۆ داواکارییە رەواکانی مامۆستایان لە هەرێم رادەگەیەنین کە بوونەتە سەرکاروانی ناڕازیبوون”.
ئەوەشی خستەڕوو، “ماوەی 9 ساڵە بەچەندین یاداشت و پەیام لەگەڵ بەشداربوون لە چالاکییە مەدەنییەکان تا ئێستا وەڵامێکمان وەرنەگرتووە سەبارەت بە مافەکانی خانەنشینان”.
ئەو وتەبێژەی یەکێتیی خانەنشینانی کوردستان دەشڵێت، “جیاوازییەکی زۆر لە نێوان مووچەی خانەنشینانی هەرێم و عێراقدا هەیە و کەمترین مووچە لە هەرێم 200 هەزارە کە ئەوە نەنگییە بۆ حکومەتی هەرێم، دەمانەوێت مووچەکانمان هاوتای ئەوان بێت”.
جەخت لەوەش دەکاتەوە، “لەسەر مافەکانمان ناوەستین تا دەگەینە هەموو ئاماجەکانمان، چونکە بڕیاری یاسای و دەستووری دادگای باڵای فیدراڵی عێراقمان پێیە و دەبێت داواکانمان جێبەجێبکرێت”.
