پارێزگاری بانكی ناوەندی رایدەگەیەنێت، كاردەكەین بۆ چاكسازی لە سیستمی بانكی و دەشڵێت، دەمانەوێت سەقامگیری لە بەهای دیناردا بەدیبهێنین.
عەلی عەلاق، پارێزگاری بانكی ناوەندیی عێراق لە وتەیەكدا رایگەیاند، یەكێك لە كارە پێشینەكانیان گرنگیدانە بە رەخساندنی ئەو بنەمایانەی كاركردن كە یاسای سپیكردنەوەی پارە و پارەداركردنی تیرۆر ئاماژەی پێداوە، جگە لە رەچاوكردنی پێوەرە نێودەوڵەتییەكان بۆ بونیادنانی سیستمی بانكی لەهەر مەترسییەكی رێكاری ناوخۆیی و نێودەوڵەتی.
وتیشی، هەنگاوەكان بەو ئاراستەیە پاراستن و سەلامەتی سیستمی دارایی دەرەخسێنێت و عێراقیش لە مەترسی جدی دەپارێزێت.
عەلاق لە وتەیەكدا لە کۆنفرانسی (دەرفەتەکانی گەشەکردن و داهاتووی هاوبەشییە نێودەوڵەتییەکان) كە ئەمڕۆ لە هەولێر دەستیپێكرد باسی لەوەشكرد، پەیوەندی نێوان جێبەجێكردنی ئەو بنەما و پێوەرانە، لەگەڵ كاركردن بە پرۆسەی حەواڵەی دەرەكی و فرۆشتنی دۆلار بەهەموو جۆر و شێوازەكانیەوە پەیوەندییەكی بەهێز و توندوڵ لەنێوانیاندا هەیە.
دووپاتیشیكردەوە، “بە پێودانگی ئەم پابەندبوونانە دەتوانین سەقامگیری دراو بەدیبهێنین و سەقامگیری نرخی دۆلار و دینار بەدەستبهێنین، كە پرۆسەیەكی گەورەیە و پێویستی بە كۆمەڵێك رێكار هەیە، بۆ گۆرانكاری و دووبارە رێكخستنەوەی سیستمی بازرگانی لە عێراقدا”.
بانكی ناوەندی رۆژانە ئەم پرۆسەیە بە وردەكاریی تەواوەوە جێبەجێدەكات تاكو دەگاتە رێگا راست و دروستەكە و هەموو رۆژێك كەناڵێكی نوێ دەكاتەوە بۆ ئاسانكاری و رێككارەكان ئەو پرۆسەیە، عەلاق وای وت.
ئەوەشی وت، گۆڕانكاری لە كاركردن بە ئابوریی نەختینە بۆ ئابوریی دیجیتاڵی، ئاستەنگی زۆریان بۆ دروستدەكات لەڕووی دابینكردنی پارەی كاش و پەرەپێدانی ئابوری و دارایی.
پارێزگاری بانكی ناوەندی ئاماژەی بەوەشدا، كە دەیانەوێت سەقامگیری لە بەهای دیناردا بەدیبهێنین و بۆ ئەوەش كاردەكەن بۆ چاكسازی لە سیستمی بانكی، لەوەشدا هەماهەنگییان لەگەڵ هەردوو حكومەتی ناوەند و هەرێمی كوردستادا هەیە.
