ئێوارەی ئەمڕۆ لە ناو باڵەخانەیەکی نیشتەجێبووندا لە شاری هەولێر ئاگر کەوتەوە و بەهۆیەوە دوو کەس برینداربوون.
کاروان عەلی وتەبێژی بەرگری شارستانی هەولێر بە تۆڕی میدیایی ئێستای راگەیاند، “کاتژمیر 4:15 خولەکی ئێوارەی ئەمڕۆ لە چوارڕیانی کورد و عەرەب لە گەڕەکی تەیراوا لە ناو باڵەخانەیەکی دوو نهۆمیدا ئاگرێک کەوتەوە، دوای گەیشتنی تیمەکانمان توانیمان کۆنتڕۆڵی بکەین”.
ئاماژەی بەوەشکرد، لە رووداوەکەدا دوو کەس بەهۆی هەناسەتەنگبوون و هەڵمژینی دوکەڵەوە دۆخی تەندروستیان تێکچوو و رەوانەی نەخۆشخانە کران، زیانی ماددیش بەر شوێنی رووداوەکە کەوتووە.
ئاشکراشیکرد، لەناو بیناکەدا ژمارەیەک کرێکاری سووری ژیاون، لەو کاتەدا سەرقاڵی خواردن دروستکردن بوون، بەپێی لێکۆڵینەوە سەرەتاییەکان ئاگرەکە هەر بەو هۆکارەوە کەوتووەتەوە.
