ئەندامێكی لیژنەی دارایی لە ئەنجومەنی نوێنەران رایدەگەیەنێت، هەرێم و بەغداد بۆ پێدانی مووچە لە رێگای بانكەوە رێككەوتوون و لەئێستاشدا لە هەرێم دەستكراوە بەو پڕۆژەیەی كە مووچە لە رێگای بانكەوە دابەشبكرێت و دەشڵێت، “ئەوەی گرنگە حكومەتی فیدراڵ پرسی مووچە لە خەرجی فیعلی جیابكاتەوە و دواتر دەتوانرێت ئەو هەنگاوە جێبەجێبكرێت”.
د. نەرمین مەعروف ئەندامی لیژنەی دارایی لە ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، لە ئێستادا حكومەتی هەرێم لە رێگای پڕۆژەیەكەوە دەستیكردووە بە هەنگاوەكانی بۆ پێدانی مووچە لە رێگای بانكەوە و ئەگەر كێشەكانی هەرێم چارەسەر بكرێن دواتر مووچە لە رێگای چەند بانكێكی هەرێمەوە دابەشبكرێت بە جۆرێك كە هەموو مووچەخۆرێك هەژمارێكی بۆ بكرێتەوە و لە رێگای بانكێكەوە مووچەكەی پێبدرێت.
ئاشكراشیكرد، ئەوەی گرنگە حكومەتی عێراق بابەتی مووچە لە خەرجی فیعلی جیابكاتەوە و كێشەكانی هەرێم و بەغداد كاریگەری لەسەر مووچەی مووچەخۆران نەبێت.
ئاماژەی بۆ ئەوەش كرد پێدانی مووچە لە رێگای بانكەوە چەند رێكارێكی دەوێت، بەڵام هەرێم و بەغداد لەسەر ئەو بیرۆكەیە گەیشتوونەتە رێككەوتن كە مووچەی فەرمانبەرانی هەرێم لە رێگای چەند بانكێكی هەرێمەوە بدرێت ئەو پڕۆژەیەش لەلایەن حكومەتی هەرێمەوە دەستیپێكراوە.
