دەزگای ئاسایشی هەرێم ئاماری چالاكییەكانی مانگی رابردووی بڵاوكردەوە و رایدەگەیەنێت، 73 كەس بە تۆمەتی بازرگانی و بەكارهێنانی ماددەی هۆشبەر دەستگیركراون.
دەزگای ئاسایش رایگەیاند، بەڕێوەبەرایەتیی ماددە هۆشبەرەکان بە هەماهەنگی لەگەڵ بەڕێوەبەرایەتییەكانی ئاسایش لە مانگی ئەیلولی رابردوودا لە چەند هەڵمەتێکی جیاوازدا لە سلێمانی و دەوروبەری 73 كەسیان بە تۆمەتی بەکارهێنان، دابەشکردن و بازرگانیکردن بە ماددەی هۆشبەر دەستگیركرد.
لەو هەڵمەتانەدا دەستگیرا بەسەر بڕی دوو كیلۆ و 220 گرام ماددەی هۆشبەر لە جۆرەکانی (تلیاک، هێرۆین، کریستاڵ، حەشیش و حەبی ترامادۆڵ).
دەزگاكە ئەوەشی خستەڕوو، لەئێستادا بە بڕیاری دادوەر بە مادەکانی (25، 26 و 30) لە یاسای بەرەنگاربوونەوەی ماددە هۆشبەر و کارتێکەرە ئەقڵیەکان راگیراون.
هەڵمەتەكان بە هەماهەنگی لەگەڵ بەڕێوەبەرایەتیی ئاسایشی سلێمانی، بەڕێوەبەرایەتیی ئۆپراسیۆنەکانی دەزگای ئاسایشی هەرێم، بەڕێوەبەرایەتیی ئاسایشی راپەڕین و بەڕێوەبەرایەتیی ئاسایشی ڕۆژئاوای سلێمانی ئەنجامدراون.
