وەزارەتی پەروەردەی هەرێم رایدەگەیەنێت، “مووچە مافێكی بنەڕەتیی مامۆستایان و فەرمانبەرانە و ئێمە سوپاسی ڕۆڵی دڵسۆزانەی مامۆستایان دەكەین و بۆ ئەم مەبەستەش سەرجەم بەڕێوەبەرایەتیی گشتیی پەروەردە پەیوەندیدارەكان ئاگاداردەكەینەوە كە بە زووترین كات دەستبكرێتەوە بە دەوامكردنی ناوەندەكانی خوێندن”.
بەپێی راگەیەندراوێكی وەزارەتی پەروەردەی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، مووچە مافێكی بنەڕەتیی مامۆستایان و فەرمانبەرانە و ئێمە سوپاسی ڕۆڵی دڵسۆزانەی مامۆستایان دەكەین، هەموو لایەكیش دۆخی دارایی ئێستای كوردستان و هۆكارەكانی دروستبوونی ئەو دۆخە دەزانین كە رووبەرووی كوردستان كراوەتەوە، زیاتر لە دوو هەفتەیە دەوامی ناوەندەكانی خوێندن دەستیپێكردووە، لە هەندێك ناوچە دەوامنەكراوە، وەك ئاماژەمان پێدا مووچە مافی بنەڕەتی مامۆستایانە و حكومەتی هەرێم لە هەوڵی بەردەوامی بەدەستهێنانی شایستە داراییەكانی كوردستانە لە حكومەتی عێراقی فیدراڵ.
هەر لە راگەیەندراوەكەدا هاتووە، “داواكارین كە هەرچی زووترە دەست بە پڕۆسەی پەروەردە و فێربوون لەو ناوچانە بكرێتەوە چونكە دەرئەنجامەكانی بایكۆت لە ساڵانی ڕابردوو زیانی هەبووە و هیچ بوارێكمان نییە گۆڕانكاری لە ساڵنامەی خوێندن بكرێت، بۆ ئەم مەبەستەش سەرجەم بەڕێوەبەرایەتیی گشتیی پەروەردە پەیوەندیدارەكان ئاگاداردەكەینەوە كە بە زووترین كات دەستبكرێتەوە بە دەوامكردنی ناوەندەكانی خوێندن”.
