بەرپرسێكی ئێرانی پێشبینی دەكات قەبارەی ئاڵوگۆڕی بازرگانیی وڵاتەكەی لەگەڵ عێراق بگاتە 40 ملیار دۆلار لەسەر دوورمەودادا.
مەهدی زیغمی، سەرۆكی رێكخراوی پەرەپێدانی بازرگانیی ئێران رایگەیاند، ئێران لەماوەی چل ساڵی رابردوودا و بەتایبەتیش لە دەیەی رابردوودا رووبەڕووی توندترین سزا بووەوە، بەڵام لەم ماوەیەدا دەستكەوتی باشی لە بواری تەكنەلۆجیا و پیشەسازیدا چنییەوە و ئامادەیە بۆ بەكارهێنانی بۆ پەرەپێدانی پرۆژە پیشەسازییەكان لە عێراق.
زیغمی لە مونتەدای بازرگانیی هاوبەشی دووقۆڵیی ئێران و عێراق وتیشی، “وەزارەتی پیشەسازی پاڵپشتییەكی بەرفراوان پێشكەشدەكات بۆ پەرەپێدانی بواری پیشەسازی لە عێراق تا ساڵی 2035”.
گرنگترین پرس لەبەردەم لیژنەی بازرگانیی هاوبەشیی ئێران و عێراق هێنانەدی بازرگانییە بە بڕی 20 ملیار دۆلار و گەیشتنە بەهای 40 ملیار دۆلار لە دوور مەودادا.
